حوار عن المتوسيكل الصيني والفرق بين الحلاوة و الدايون والهوجان والبجاج الهندي بالصور

السلام عليكم
يا ريت حد يدلنى على انسب وأامن موتوسيكل صينى ينفع للزوجة انها تركب مع زوجها بأمان فى بعض الاخوة دلونى على دايون 40 او هوجان 5 عشان مواصفاته مناسبة لطلبى...؟؟؟ هل الاختيارات دى الافضل فعلا...؟؟؟ ده اللى اتنصحت بيه
وايه رأيكم فى هوجان 7 و دايون 7 و12 كينج 2 "كل دول شبه الهارلى كده" ده اللى فكرت فيه
يا ريت تنصحونى او تاكدولى على معلومة
وايه الفرق بين اللى اتنصحت بيه وبين اللى فكرت فيه؟
لا خاب من استشار وشكرا جزيلا على تعاونكم
------------------------
والله يا استاذ ايمن انا هقولك اللى عندى ولو انى ما احبش انك تشترى موتوسيكل لانه خطر....
المهم انا كان معايا موتوسيكل دايون A2 اللى هو الصغير وكان بيشيلني انا والعيال وكان جامد وسعره جديد فى 2009 كان 3100 جنيه ، وقطع غياره رخيصة جدا وموفر جدا فى البنزين ، وانا انصحك لو الحمل ( الوزن ) مش كتير فهو افضل من ناحية سعره وتوفيره فى البنزين وقطع غياره ومش هتحس بيه خالص ، اما لو الحمل كبير شوية فانا انصحك بدايون اربعة او اى دايون ولااااااااااااااااااااااااااااا غير الدايون لانه انضف ماركة فى الصيني وكل قطع غياره متوفرة فى اى مكان ورخيصة كمان لو الهوجان والأنتوس والكلام دا مهما سمعت عليه وخدها منى نصيحه لانى شفت بعنيا هتدوخ على قطع غيارهم ( وعلى فكرة انا من امبابة وانت كمان من امبابة يعنى اللى بقولك عليه دا هتصادفه انت وهتدعيلي ان شاء الله) قطع غيارهم قليلة وكنت بشوفهم بيشتروا قطع غيار الدايون والميكانيكي كان بيعدل عليها عشان تركب ....طب فيبقي ليه !! ما نشترى الدايون على طول اسهل  
------------
اها صحيح يا استاذ ايمن نسيت اقولك
ان مافيش موتوسيكل امان للأسف
مرة كنت ماشي ومعايا العيال وسلك الدبرياج اتقطع والحمد لله كنت على سرعة قليلة وموقعناش ومرة كمان الجنزير كان بيخبط فى علبة الجنزير فرحت عامل ناصل وشايل العلبة خالص واللى كان راكب ورايا هدومه كلها الجنزير وبرضو لولا ستر ربنا وماشي بالراحة كان مات ..... وكنت رايح مستشفي القاهرة التخصصي اللى روكسي مرة وعربية قدامى كانت بتهدي وجيت اهدى لاقيت سوسته الفرامل طارت والفرامل نزلت وماطلعتش وقفشت فى العجلة وكنت هموت لانى كنت ماشي على 70/80 تقريبا لكن الحمد لله ربنا سترها .................وانا بقولك كل الحاجات دى عشان بس تخلى بالك ان الموضوع خطر وغير العربية وبالذات الموتوسيكل لو سمعت فيه او حسيت بفسووووووووووة تغير فى اى حاجة لازم تروح فى يومها او فورا للميكانيكي لان لدعته وحشة وبتزعل جامد وربنا يسترها عليك وعلينا يارب 
-------
الف شكر عمنا ابو رقية على نصيحتك... الحقيقة الحمل عندى مش كبير بالعكس ده خفيف خالص "زوجة وطفلة 3 سنوات" لكن انا دورت على الموديل اللى حضرتك قولتهولى مش لاقى صورتة خالص وبما انى ماليش فى الموتوسيكلات فا كل الفرق اللى بشوفة بين موديل والتانى هو موضوع الشكمان "يمين بس او يمين وشمال وفوقية دواسات للراكب الخلفى" بالاضافة للموديل العريض اللى تقريبا دايون 7 او 12
لكن نصيحة حضرتك عموما ان الدايون افضل من الهوجان ... مش كده؟؟؟ طيب ايه وضع حلاوه بالنسبة للدايون ؟؟؟ وهل فى موديل بيتميز عن موديل فى نفس الماركة؟؟؟
معلش تقلت عليك بكتر الاسئلة ... يا ريت لو تحطلى صورة للموديل A2 اللى قولتلى عليه اكون شاكر افضالك ... اللى مخلينى افكر فى الموتوسيكل انى عرضت العربية للبيع وفى ظروف الزحمة اللى احنا فيها مش هاينفع اركب مواصلات تانى وخصوصا مع وجود الاسرة "المشى ارحم" واهو الموتوسيكل حل وسط بين المشى والعربية الملاكى
واشكرك مره تانية
-----------------
بص يا سيدي دا اللى انا بكلمك عليه



وهتلاقي منه الجديد الفانوس الكبير اللى قدام مدور مش مربع وكمان تقدر تركبله دواسات كبيرة زي بتاع دايون 14 وكدا ( بالنسبة يعنى للى هيقد وراك بدل ما يحط رجليه على البتاعتين الرفعيين بتشترى السندات الكبيرة وبتركب عادى )


ودى دايون 3 اللى اكبر شوية من الايه تو وهى اعرض سنة والتنك اكبر شوية بسيطة وكمان جاى معاها السندات متركبه



فى بقي التفاحة اللى هى دايون 4 اللى اكبر من دول وبشكمانين



وكل دوووووووووووووول وكل الصيني وكل الدايون 150cc الموتور بتاع كله واحد والشكمان الواحد او الشكمانين بيفرق فى إخراج هواء الموتور فقط ودا معناه ان ابو شكمان واحد بيسخن اسرع من ابو شكمانين وكله شغالين بيه دليفري يا معلم يعنى الموضوع ملهوش لازمة قوى بس اهم شيء الاهتمام بكل كبيرة وصغيرة فى الموتوسيكل ودي نصيحتي ليك .

اه صحيح ولو عايز حاجة نضيفة ومعاك مبلغ اشترى بجاج هندي ودا احسن وانضف بكتير فى سواقته وبيستحمل لكنه غالى وقطع غياره طبعا غالية بالمقارنة بالصيني ودي صورته



وبالله عليك بالله عليك بالله عليك يا اخى طول ما انت سايق ومعاك حد ما تعديش سرعة 40 بالله عليك كمان مرة وخلى بالك من الرمل واى مية واى بقعة زيت تبعد عنها لان فى فخ ناس كتير بتقع فيه انه يمشي بالراحة فى المية او الزيت واول ما يطلع منها يطلع يجري فيقع .حاسب والنبي ياشيخ وانا افضل تشترى سيات احسن والله وربنا يسترها عليك وعلينا يارب 
---------------


والموتوسيكل A2 اسمه 2B بس هو بيتقال عليه ايه تو او الدايون الصغير او النحلة .. المهم ان انت عرفت شكله

وبالنسبة للحلاوة فنفس نظام الهوجان والانتوس برضو مش هتلاقي قطع غيار كتيرة ليه وهتلاقيهم غاليين ومشقلب شوية حاجات عن المعتاد مش متذكر دلوقتى تفاصيل بس اللى اقصده ان لو فى حاجة متركبة مثلا فى اليمين كباقي موتوسيكلات العالم هتلاقيها فى الحلاوة شمال او العكس يعنى....كمان اصغر من الدايون والعجلة اللى قدام ارفع من عجلة الدايون وسوقه قليل لو حبيت تبيع بخلاف الدايون يوم ما تفكر تبيعه


الفكرة فى الحلاوة عاملة زى بروسيسور AMD كدا هو حلو لكن سوقه فى مصر قليل ومش اى حد يبيع قطع غياره اما INTL ( الدايو يعنى) سوقه شغال واى محل قطع غيار بيبيع حجاته 
-----------------
الله الله الله عليك يا كبير انت كده كأنك اديتنى درس خصوصى فى الموتوسيكلات
وكمان صور وشرح وفروق بين الموديلات ..... تسلم لنا يا غالى
انا كده هاخلى ادارة المنتدى تغير عنوان الموضوع عشان يبقى اوضح لانه بيحتوى على اكثر من اللى فى العنوان
عايز بس اطمنك ان الاستخدام هايكون محدود للغاية لان مشاويرى مش كتير وبتنحصر فى امبابة "داخليا يعنى" عشان كده مش عُرضة للجرى والسرعة وبطبيعة الحالى حضرتك عارف شوارع امبابة "قد ايه مميزة بالطرق الوعرة الجبلية" اللى مابتديش فرصة للواحد يمشى فى المعدل المتوسط حتى وكل فكرتى انى اهرب من الزحمة الى الشوارع الجانبية بتبقى سالكة اكتر ومافيهاش اتجاهات اجبارية وكمان ممكن اعدى من فتحة صغيرة فى الرصيف بدل ما اروح الف من يوتيرن فى شارع تانى... دى وجهة نظرى عن الاستفادة من خفة الموتوسيكل فى التنقلات الداخلية الاسرية واللى برضه ارحم من التوكتوك واستهتار وجشع سائقية
بمناسبة الباجاج الهندى انا شوفت موديل اسمة بلاتينا 125 تقريبا وسعرة 5500 هل ده اللى حضرتك تقصدة وفى منة نوع تانى تقريبا ديسكفرى بـ 6500 وفى منهم تقسيط وتقسيط بدون مقدم للموظفين هل دى الاسعار اللى حضرتك تقصدها فى الهندى...؟؟؟
اللينك اللى حضرتك حطيتة فى الموضوع ممتااااااااااااااااااااااااااااااااااز جدا ...جزاك الله خير
كان مكتوب فى الموقع ده ان موتوسيكلات حلاوة اوفر فى البنزين (45-50كم/لتر) بينما الدايون (35-45كم/لتر) يعنى فرق 10كم لصالح حلاوة....!!!!!!!وتبريد حلاوة هزاء+زيت وبيقول انه بيسخن اقل او ابطأ من تبريد الواء فقط اللى فى دايون....
وفى ناس بتقول ان الدايون 40 كويسة لكن الهوجان 5 عزمها اكبر
بالنسبة لنقطة الامان اللى كنت اقصدها"خصوصا للراكب الخلفى" هى شكل الموتوسيكل من الخلف النيكل المحوط على الراكب والضهر اللى فاخر الكرسى والدواسة العريضة اللى راكبة فى النيكل الليى عامل زى الصدادات الخلفية كده .... يعنى باختصار الشكل العام اللى بيحمى الراكب وبيحوط علية وده مش شايفه فى الموديلات اللى ذكرتهالى فى الصور بما فيهم الباجاج الهندى واللى يعتبر اقيمهم وافضلهم
هو يمكن اكتر حاجه قريبة من اللى بالى دايون 40 و7 و12 و14 
-----------
تحت امرك فى اى وقت واى حاجة انا اعرفها هقولك عليها ان شاء الله ولو طلعت قريب منى هظبطك مع ميكانيكي كويس ، اما بقي بالنسبة للحلاوة فهى حلوة لشاب كدا صغنون فردانى لانها صغيرة قوى وهتفكرك بافلام الكرتون والدايون الصغيرة برضو صغيرة لكن الحلاوة أوطى واصغر منها ، المهم خليك فى الدايون الكبير احسن وكلهم زي بعض ونفس العزم ونفس الموتور مع اختلاف الاشكال , بالنسبة للأمان وكدا فدى حاجات انت اللى بتركبها فيها وامانك الأول فى الموتوسيكل هو ربنا و مشيك العاقل لان لاقدر الله اى خبطة لاى موتوسيكل فى الدنيا حتى الريسات بيكون اسلم حل ليك انك تنط من عليه مش حديد بقي واكصدمات وبعدين ياسيدي فى موتوسيكلات بتبقي نازلة بحديد من قدام وليها مسند ضهر فى الدايو ممكن تشتريها

انما البجاج ..... ياعيني ويادلع البجاج حاجة محترمة فعلا - وللاسف انا ماليش فى انواعهم وكدا - لكن ماركة بجاج قديمة ومن زمان ومحترمة جدا وهتريحك كتير بدل ما كل شهر ولا شهرين تروح للميكانيكي يظبطلك تاكيهات بقي و فلاتر واللذى منه , انت هتشترى البجاج وتحطله بنزين 92 و زين موبيل ديلفك ( الجركن الاسود ) وعيش يامعلم


ملحوظة : انا كنت بحط للدايو بنزين 92 وزيت موبيل دلفك وكنت بغيره كل عيد تقريبا او كل مناسبه اصل انا ما كونتش بحرق زيت كتير يعنى مش بحمل على غيار واحد ........المهم اى مكنة تشتريها ريحها بزيت كويس وبنزين كويس ، وان شاء الله ربنا يكتبلك اللى فيه الخير  
------
حقيقى مش عارف اشكر حضرتك ازاى على الاهتمام الجميل والنصائح الاجمل دى
ان شاء الله اخد بيها كلها
وربنا يسترها علينا جميعا ويحفظنا
-----
اولا... خد بالك الموتسيكلات ديت شر لابد منه ...ههههههههههههههه..
لو حضرتك عايز حاجه تقضي بيها مشاويرك وانا شايفك مقتنع بالصيني بس صدقني لما تتعلم وتبقي بتسوق بتمكن هتكره لان للاسف الصيني موتوره 1 بستم 150 سي سي ؟؟؟؟؟
والهندي البجاج نفس القصه واخره 220 سي سي ...

الميزه الوحيده التوفير في البنزين ده غير انه مفيهوش لا فلتر بنزين ولا زيت ...
انا معايا هوجان 5 والحمد لله معايا ايضا هوندا سي بي 4 ؟..فرق شااااااااااااااااااااااااااسع في السحب وديت اهم نقطه بالنسبه ليه انه يجمع بسرعه في الغيارات وده مش هتلاقيه في الصيني ...
عموما الهوجان ولانه اول بايك ولخوفي من اليباني لاني لسه جايبه وخايف من اعطاله وقطع غياره وبالنسبالي الموتسيكل سواء صيني او يباني يعتبر ايدي ورجلي نظرااا لعملي ومشاويري....

نصيحه لو هتجيب صيني خليك في هوجان 5 لانه بمسند من ورا وليه دواسات محترمه للراكب الخلفي وبايك يعتبر الافضل في مساله العزم وديت صورتوا...



وبلاش موضوع انك تركب المدام وبنتك معاك علي الموتسيكل .... خطر جدااااااااااااااااااااااااااا وحرام تقحمهم معاك في هذه الخطوره...
والله انا باشوف حالات حوادث وللاسف احيانا بيبقي واخد زوجته و بتبقي كدمات ولسعه محترمه من الشكمان ....
----
الف شكر لحضرتك يا دكتور على الايضاح العظيم ده
بس الفكرة انى اصلا مش غاوى موتوسيكلات ولا الحاجات دى ولو عليا لوحدى والله اركب عجلة واقضى بيها مشاويرى" ماتضحكش عليا يا دكتور....ههههههه" والله بتكلم جد
انا بعشق العجل جدا وخصوصا لو حاجه محترمة ومش خسارة فيها الفلوس
لكن الغرض من الموتوسيكل عشان المدام وبنتى لان امبابة بقت حاجه لا تطاق بجد من الزحمة فى شوارعها بسبب التوك توك اللى بقى اكتر من الناس ده غير الطرق اللى بيرسموا عليها لوحات نحت وحفر غائر اكتر من اللازم والعطلة سواء راكب ملاكى او مواصلات وتحكم سائقى التوك توك كما لو كانوا راكبين الليموزين تخيل حضرتك ... ماينفعش توقف توك توك وتركب وبعدين تقوله ودينى الحته الفلانية .... لا لا لا ده انت تسأله الاول وهو ماشى وبصوت عالى .... كذا يا اسطى؟؟؟؟ وهوه ومزاجه لو هايركبك يركن لك بعدها ب50 متر ولا حاجه ولا هاينفض مش هايرد اصلا واحيانا يبقى معايا شنطة ولا حاجه والمدام والبنت ولولا العربية موجوده دلوقتى كنت بيتت عند امى ولا حماتى وماروحتش بيتى فا الغرض من احتياجى عشان المدام وبنتى وربنا يرحمنا من الزحمة
-------
عندك حق فيما يخص التكتك...
للاسف عندنا برده مفكرين نفسهم بشاوات وبيختار المشوار علي حسب مزاجه ..
يا راجل ده مره ركبت تكتك وكانت معايا والدتي والواد مشغل الكاسيت ومعليه وبقله اطفي البتاع ده تخيل يرد يقلي مش عاجبك انزل..؟؟
طبعا انا اتعصبت وقلتله عند بعند مش نازل غير في القسم ...
بص الهوجان 5 جميل وقطع غياره ببلاش ومتوفره ... انا مش عارف ا. ابو رقيه بيقول انها مش متوفره ازاي..؟؟
عيب الصيني الهيكلي ان مفيش شاسيه حته واحده .؟؟؟
بمعني الشاسيه نازل ماسك الجدول ومربوط بمسمار في الشاسيه اللي شايل الموتور وده بيسبب زبزبات الصيني المشهوره ...
فيه مكنه اسمها حلاوه وينج تقريبا موديل 2009 وهتلاقي محفور علي الموتور made in china ديت الوحيده اللي شفت فيها الشاسيه كامل مش حتتين مربوطين بمسمار وهو نفس شكل الهوجان 5 ....
وربنا يوفقك ويحفظك انت والاسره الكريمه من شر الموتسيكلات ...
------

 صباح الخير عليكم جميعا
ازي حضرتك يا دكتور نوح .......والله شوف انا قلت بالنسبة للصيني كله تقريبا نفس الموتور وعزمه واحد ورشحت لأستاذ ايمن الدايون الصغيرة لان كل حاجاتها رخيصة وبسيطة ومتوفرة وعلى فكرة انت لو نزلت امبابة واتعاملت مع بتوع قطع الغيار هتلاقيهم بيجيبوا الحاجات اللى عليها سحب كتير ومش بتقعد فى المحل وكنت بشوف ناس معاها هوجان وناس معاها انتوس واللهى بيجوا عند بتوع قطع الغيار والراجل يقوله انزل الوكالة ( وكالة البلح ) وانا لمست فعلا توافر قطع غيار الدايون لما كنت بروح المعادى و المهندسين واى واحد بتاع قطع غيار موتوسيكلات كنت الاقي عنده طلبي
وانا والله مش عارف ليه نفسي امبابة تتنضف ويسفلتوا الشوارع وبجد بجد اتمنى ربنا يسترها على كل اللى بيركبوا موتوسيكلات لان الواحد شاف الموت بعنيه بسبب الاهمال - كنت بقول مادام ماشي خلاص واجل لأخر الشهر كل حاجة - ولو تقدر يا استاذ ايمن تجيب 126 او سيات وتقريبا بنفس التمن بس هتبقي على الاق ماشي باربع عجلات
---
يا باشا بلاش موتسيكلات خالص العضو الكريمabu ruqayyah مجرب وبيقلك خطير جدا وحضرتك هتركب زوجتك وابنك الصغير فبلاش منه احسن واقضيها حتي مواصلات لو مادياتك متسمحش تجيب عربيه عشان تأثر السلامه ليك ولاسرتك
--
انا لسه شاري دايون 40 من اسبوع
وفي حلاوه اكسبريس نفس شكل الدايون ونفس قطع الغيار طبق الاصل لكن سعره ازيد من الدايون 500 جنيه ومش عارف ايه السبب
لكن ال 2 نازلين بالدواسه الجديده الدواسه الحريمي
وزي ما الاخ قالك لن بعد اللف والدوران خليك في الدايون 40 او حلاوه اكسبريس الاثنين الاكثر انتشارا مش اي كلام انتشار علي مستوي الجمهوريه في جميع المحافظات
الاثنين طلمبه البنزين ياباني وممكن بعد فتره تغيير الكاوتش الامامي والخلفي بكاوتش عريض لثبات اكثر
ولازم تركب اكصدام امامي في ب50 وفي 70 جنيه ضروري لحمايه الموتوسيكل وحمايه رجليك
ولو ان الموتوسكل خطر جدا جدا جدا
وغير عملي في الشتاء نهائي
--------------
متابع......

انا حاولت أتعلم من كام سنة

بس الفتيس اللي في الرجل مشكلة

شكرا خاص للدكتور نوح وأبورقية
------------------
لو بتعرف سوق عربيات تسوق الموتوسيكل بسهوله
انا طلعت بالموتوسيكل بدون تعليم نفس فكره العربيه لكن بتغير رجلك ويمكن غياراته اسهل من العربيه
لانها كلها في اتجاه احد
-------------
نفس مشكلتي مع السيارات مع اني باعرف اسوق بس باتلغبط كتير ..
مع ان الموتسيكل غير عملي في الشتا بس الواحد اتعود عليه...
------------
الف شكر عى النصيحة لكن بكل الاحوال الموتوسيكل ولا العجلة تى ارحم من المواصلات فى المنطقة اللى انا فيها"ربنا ما يوريك" الزحمة فى الاتجاهات والاهمال سيد الموقف
--------------------
اشكرك جد على المعلومات القيمة دى وربنا يجازيك خير
الواحد كل يوم يعرف معلومة جديدة ومفيدة
الف شكر
--------------
موضوع جميل من ناس زى العسل دلوقت كنت ناوى على بجاج 180ccبوليسار سعره 9700 بالصدفه لقيت واحد راكن موتوسيكل شكله زى البجاج بس العجل اعرض المهم انا قولت شكله كده بجاج بس لما قربت لقيت علامه DAYUN) وكان لونه ليمونى والعجل نفس اللون قولت الماركه دى مش غريبه دى صينى فضلت ابحث على المواقع علشان اشوف نفس الشكل مفيش دخلت على الموقع وجبت النوع Motorcycle-150CC-DY150-6 وبالصدفه لقيت واحد راكب الموتوسيكل وماشى بس صوت المتور كان ناعم عن اى موتوسيكل صينى بصراحه دخل دماغى سالت على سعره عامل 5600 ياريت ياجماعه اعرف ايهما افضل لان كان معايه موتوسيكل هوجان 3 الجديد وكان صوت المتور عالى وكان فى رعشه زهقت منه مقعدش معايه 4 شهور وبعته وسالت ناس صنايعيه قالو بلاش بجاج عشان قطع الغيار غاليه ومش موجوده ياريت ياجماعه النصيحه اتوكل على الله واجيب Motorcycle-150CC-DY150-6 ولا بلاش صينى وياريت اعرف الفرق بين الهندى والصينى واسف ياجماعه طولت عليكم
------------
طيب يا جماعة انا دلوقت معايا حق موتوسيكل 2b اجيبه ولا ايه
-----------
بلااااااااش موتسيكلات انا كنت بسوق ريس واخر مره كنت بجري انا واحد صاحبي ماجرين انا وهو عمل حادثه جامده ودماغه اتفتحت فعلا ال 126 شكلها وحش بس اامن