حلويات مفاجاة بالصور

اللسان
عجينه ملفى بالشيكولاته
نفرد العجينه لارتفاع 8 مللى ونقطع بالقطاعه وندهنها بالميه ونرش عليها سكر ونضغط عليها بالمردانه لتثبيت السكر فيها وترص فى الصاج على ابعاد ونتركه ترتاح نص ساعه ثم تدخل فرن ساخن على درجه حراره 150 : 160 درجه وبتاخد حوالى 35 الى 40 دقيقه وبعدي ما تخرج من الفرن نزينها بالكريمه الصيامى ونغطيها بواحده تانيه زى الصوره

-----------------------------------
  الكريم بورليه بكل تركات الكافيهات الكبيره

3اصفر بيض
40 <م سكر
300 جم كريمه لبانى
فانيليا - رشه ملح
الطريقه
1- نغلى الكريم اللبانى على النار
2- نضرب الآصفر بيض مع السكر والملح بمضرب يدوى بسرعه حتى يتجانس
3- ننزل بالكريمه اللبانى خيط رفيع على خليط البيض لنرفع درجه حرارته ومش يبقى زى البيض المقلى ونخلط بسرعه
4-نصب الخليط فى قوالب فى حمام ماء ساخن يكون واصله لنص القالب وتدخل الفرن على درجه حراره 140 درجه وبتاخد حوالى ساعه
5- تخرج من الفرن وتترك لتبرد ثم نرش عليها شويه سكر وتحرق بالباشبورى او ممكن تدخل الفرن تحت الشوايه تاخد وش جراتان وتقدم بالف هنا
--------------------------------
تارت الفراوله بالكريم باتسيريه

مقادير التارت
300 جم دقيق
200 جم زبده
100 جم سكر بودره
مقادير حشو التارت
100 جم كريم باتسيريه
100 جم عصير فراوله
150 جم كريمه لبانى
وحدات من الفرواله
طريقه التارت تخلط كل المقادير معا ثم تضع فى القوالب والضغط عليها لتفريغ اى هواء موجود بين العجينه والقالب ثم عمل ثقوب بسكين مدبب وتدخل الفر على 180 درجه وبتاخد حوالى 20 :25 دقيقه
طريقه الباتسيريه بالفراوله
نضرب عصير الفراوله والكريمه اللبانى بالكريم باتسيريه البودر حتى يتماسك ونحشى بيه التارت ونقطع الفرواله قطع ونجمل بيها حسب الذوء ويقدم بألف هنا
------------------------ 

الباناكوتا

المقادير
300 جم لبن
300 جم كريمه لبانى
125 جم سكر
15 جم جيلاتين
صوص فراوله (ربع كيلو فراوله -50 جم سكر - معلقه عسل جلوكوز وغلوه على النار )
الطريقه
نحط الجيلاتين فى ميه من الحنفيه علشان تسيح
لو جيلاتين شرائح نحطها فى ميه حتى تطرى خالص ونعصرها بابدينا ونودبها على حمام ماء ساخن
لو جيلاتين بودر نحط 3 اضعافها ميه ونسبها حتى تتشرب كل الميه وتصبح مثل الاسفنج وبعدين ادوبها
1- نغلى اللبن على النار وبعد ما يغلى ارفعه من على النار واحط السكر واقلب واسيبه يبرد شويه
2- نضرب الكريمه اللبانى شويه مش عايزينها تتماسك يدوب شربه خفيفه
ودى تركه للشيف لاعطاء الهشاشه وبعدين احطها على اللبن والسكر بعد مايبرد وبعدين فى الاخر احط الجيلاتين المذاب فى الميه
3- اصبها فى القوالب وادخلها الفريزر ويستحسن اسيبها لتانى يوم وبعدين اقلب القالب فى طبق التقديم واحط شويه صوص فراوله ووحدات الفراوله وازينها وبألف هنا
---------------
احلى ام على بكل تركاتها زى محلات الفايف استارز

 
 المقادير
100 جم ملفى مكسر
لتر لبن
75 : 100 جم سكر للتحليه
ممكن قطعه قشطه لتعطى طعم مميز
كريم شانتيه بدون سكر للتزين فوق ام على
جوز هند وزبيب ومكسرات حسب الرغبه
الطريقه
1- تكسر الملفى مثل الصوره ونضعه فى طاجن او بوله
نضع على الملفى جوز هند وزبيب وحسب الرغبه
2- نغلى اللبن وبعدين نحط فيه السكر
3- نضع اللبن المحلى على الملفى ونتركه 5 دقائق حتى يتشرب اللبن ونشوف لو الملفى نشف نحط ليه شويه لبن تانى بحيث لما نحرك البوله يتحرك بسرعه
4- نضرب 50 جم كريم شانتيه فى 125 مللى ميه ونضعه فى كيس حلوانى ونزين بيه الوش ويدخل الفرن حتى ياخد وش جراتان ونجمله بشويه مكسرا حسب الرغبه
تركه الشيف
لانضع السكر على اللبن الا لما يغلى علشان ميقطعش ويبوظ
نترك ام على تشرب كويس من اللبن ونضع شويه لبن حتى يكون اللبن اكتر
-----------------------

طريقه الكريمه الزيده للشيف احمد القاضى بمنتهى السهوله

4 ابيض
رشه ملح
50 جم سكر خرز
الشربات
300 جم سكر خرز
50 جم ميه
معلقه عسل جلوكوز
350 : 400 جم زبده حسب رغبتك
لو عايزه السكر اقل شويه يبقى تزودى الزبده الى 400 جم
الطريقه
نضع ال 300 جم سكر مع ال50 جم ميه على النار حتى نصل الى السوفت بول (الكوره الطريه ) معناها ايه نجيب كوب ميه ساقعه ونضع نقطه من السيرب ونلاقى النقطه اصبحت كوره طريه
واول مايغلى بحوالى 5 دقائق نضرب الابيض بيض وبعدين نحط رشه ملح ونضرب هنلاقيه تتضاعف الخليط نحط شويه شويه سكر مع الضرب واصبح متماسك مثل الكريمه ونهدى السرعه ونحط السيرب خيط رفيع اوى ونضرب حتى يخلص المقدار هنلاقى الكريمه لغايه هنا اصبحت متماسكه ولونها ابيض هتسمى لغايه هنا ايطاليا ميرنج ونشتغل بيها وهى دافيه

ولو عايزه تعمليها كريمه زبده تزودى 350 : 400 جم زبده
نضرب الخليط لغايه ما يبرد ونحط مكعبات الزبده الطريه شويه شويه ونضرب حتى يتماسك الخليط ويتغير لونه شويه ويصبح ملمسه ناعم
اهم التركات
الملح ماده حافظه
الملح بيدى طعم للكريمه
البوله اللى بنضرب فيها لازم تكون ناشفه ومش عليها اى ماده دهنيه ولا البالون بتاع المضرب حتى الميرنج يكون ناجح
------------------
اسبونج فانيلياصاج 30 فى 40 سم
اسبونج بالكاكاو صاج 30 فى 40 سم
مقادير اسبونج سويسرول

4 بيض
12 جم محسن
120 جم سكر
195 جم دقيق
4 جم بيكنج بودر
65 مللى ميه
نضرب البيض مع السكر مع الميه والمحسن ونص الميه ونص كميه الدقيق لغايه ما يتضاعف ويبقى 3 اضعاف الكميه ويتماسك مثل الصوره لما نرفع المضرب يشكل لنها عرف الديك نهدى المضرب ونضع باقى كميه الميه وباقى كميه الدقيق على 3 مراحل ويدوب يتجانس نصبه فى صاج مفروش سيلكون او ورق زبده ويدخل الفرن على حراره 19 :200 درجه وبياخد حوالى 12 : 15 دقيقه
واليوم التانى نقطعه شرائح كل شريحه مثل الصوره
ونضع طبقه من السويسرول الفانيليا وطبقه من السويسرول الكاكاو وكده والجاتوه يكون عادة مكون من 4 طبقات فوق بعض
نحشى كل طبقه بالكريمه الزبدة
وتركه الشيف
نتركه لليوم التانى حتى نحشيه ونشكله
نقشر سطح السويسرول علشان ميعجنش ومش يعمل فاصل بين الطبقات
نحشيه بكريمه زبده علشان تتماسك ونقدر نشكلها على شكل هرم
بعد ما حشينا ونيجى لاهم نقطه اننا نشكله ازاى ونخليه شكل الهرم
نسحب السويسرول على حافه البلانشا مثل الصوره ونثبت السكين على الطرف ونقطع بالورب وناخد الجزء اللى شيلناه ونقلبه- بحيث لما نحطه جنب القطعه التانيه يشكل شكل الهرم ونضع على طبقه من الاسبونج ونلزقه بقطعه كريمه زبده ونضع بين كل واحده كريمه زبده وتدخل الفريزر يتماسك وبعدين نخرجه ونصب عليه الشيكولاته السايحه وندخله تانى الفريزر وبعد ثلث ساعه ويخرج من الفريزر لنقطعه ونضع السكين فى ميه ساخنه حتى يسهل علينا عمليه تقطيعه
تركه الشيف
استخدام طرنش حامى ذات اسنان رفيعه وعلى شكل دائره مثل الصوره حتى تتحكمى فى التقطيع بطريقه صحيحه دون ان يتكسر

--------------------
كاسات اسبونج روعة

قطع من الاسبونج
قطع من الفراوله
كريمه لبانى ومعاها نسبه من الكريم باتسيريه
صوص فراولهومكوناته
100 جم فراوله
25 جم سكر
معلقه صغيره عسل جلوكوز وممكن معلقه صغير جيلاتين ذائب فى 3 اضعافه ميه
نحط الفراوله والسكر على النار لغايه ما يغلى ويتماسك نضربه فى الخلاط ونصفيه وممكن ندوب معلقه صغيره جيلاتين ونضربه معاه
ونحضر الكاسات ونعمل عليها شكل سريالى من الشيكولاته السايحه وندخلها الفريزر تتماسك وبعدين نخرجها ونضع فيها الكريمه وبعدين قطع الفراوله ووفوقها قطع من الاسبونج ونكر نفس الطريقه حتى تمتلآ الكاسات وتجمل وبوحدة فراوله او نقطع فراوله ونضعها عليها بشكل ورده
وتقدم بألف هنا
ونحضر الكاسات ونعمل عليها اشكال من الشيكولاته السايحه ثم تدخل الثلاجه تتماسك ثم نخرجها ونضع كريمه عباره عن كريمه لبانى ومعاها نسبه من الكريم باتسيريه ونضع فوقها قطع الفراوله وفوقها صوص الفراوله ووفوقها قطع من الاسبونج ونكرر تانى الكريمه وفوقها قطع الفراوله وفوقها الصوص وفوقها قط اللاسبونج وفوقها كريمه ونجملها بقطع الفراوله
 ---------------------------
العيش الباجى

نص كيلو دقيق
10 جم خميره
10 جم ملح
30 جم سكر
30 جم زبده
3 جم محسن
275 مللى ميه حسب العجينه لما تتجانس
حراره الفرن 160 درجه وبتاخد حوالى 20 الى 30 دقيقه
نحط كل المقادير معا وتعجن حتى تتكون شبكه الجلوتين وهى لما ناخد قطعه من العجينه ونبططها فى ايدينا ونمسكها ونشدها تكون رقيقه ولم تتقطع ومطاطه وبعدين نسبها ترتاح شويه وبعدين نقسم العجينه الى جزئين متساويين او 3 اجزاء الشيف هنا قسمها جزئين وعمل كل جزء رول ولفه على التانى مثل الصوره وبعدين سابه يخمر
وتركه الشيف هنا فى التخمير ممتاز وبتدى نتيجه روعه
هتجيبى اى صينيه وفيها ميه مغليه وتحطيها على ارضيه الفرن وهو مطفى مش شغال وتحطى العيش على الرف الوسطانى وتسبيه حوالى ساعه هتلاقيه ماشاء الله تضاعف حجمه وبعدين تدهنى وشه باصفر بيض ورشه نسكافيه او رشه فانيليا وتحطى رشه سمسم وبألف هنا
تركه الشيف هنا
التخمير بيمر ب 3 مراحل
1 - نعجنها وبعدين نسبها ترتاح شويه
2 - نشكلها وبعدين تخمر
3 - لما تدخل الفرن تتضاعف مره ثالثه
وحمام الميه المغليه بيخلى العجين فيه رطوبه ومش يقشف ويساعد على التخمير بطريقه صحيه
الملح مهم جدا - تحسين الطعم
يساعد على التخمير وماده حافظه
---------------------
عجينه التارت

 
 300 جم دقيق
200 جم زبده
100 جم سكر بودره
معلقه زيت ذره
نعجن كل المقادير ما عدا الزيت فى الاخر خالص وتريحه وتضع فى القالب وتضغط عليها كويس لاخراج الهواء اللى بين عجينه التارت والقالب ويتم عمل بيه ثقوب بطرف سكين علشان لما يدخل الفرن يفضل زى ما هو ومش يرتفع ولما يخرج يترك ليبرد تماما ويصب عليها الموز المكرمل
طريقه الموز المكرمل
نص كيلو موز مقطع مثل الصوره
50 جم زبده
50 جم سكر
رشه قرفه وممكن شويه زبيب حسب الرغبه
نقطع الموز بس بعد الكراميل ما نحطه على النار علشان الموز مش يغير لونه ونعصر عليه نص ليمونه ليحتفظ بلونه
نضع الزبده على النار تدوب ونضع السكر عليها ونقلب
حتى يتغير لونه ويصبح لونه اغمق من لون العسل النحل شويه وننزل بالموز عليه ونقلب بسرعه حتى يتجانس ونرفعه من على النار ونكمل تقليب ونضع الطاسه فى صينيه اكبر منها فيها ميه حتى لا تزيد السخونيه فى الطاسه والكراميل يجمد اكتر ونصب الكراميل على التارت وبعدين نعمل كريم باتسيريه ونضع على الوش ويدخل الفرن ياخد جراتان ويقدم بألف هنا
---------------
قشطه الافران 

ممكن تحشيها ملبن او عجوة او سكر وقرفه وجوز هند
مقادير القشطه
325 جم دقيق
100 جم سمنه
50 مللى زيت
50 جم سكر
رشه ملح
7 جم خميره
100 جم ميه
الطريقه
نعجن كل المقادير معا فى العجان تقريبا من 7 الى 8 دقائق حتى تتجانس العجينه وتكون فيها لامعه وملساء ونغطيها ونتركها تخمر حوالى نص ساعه مش محتاجين تخمير كتير ولا محتاجين محسن خبز
ثم نشكل العجينه رول طويل حتى تسهل تقسيمه لقطع متساويه الحجم مثل الصوره
وناخد كل قطعه ونلفها على الرخامه براحه اليد حتى تتكور وناخدها ونحطها فى الصاج ونضغط عليها ومش محتاجين تسيب فراغ وممكن نحشيها ملبن او عجوة او سكر وجوز هند ورشه قرفه وممكن ساده حسب الرغبه وندهن الوش باصفر بيض ورشه سمسم
ويسخن الفرن على درجه حراره 150 درجه وبتاخد حوالى 20 الى 25 دقيقه وبألف هنا
----------------
  عيش البتى بان

مقادير
نص كيلو دقيق قوى
10 جم خميره
30 جم سكر
10 جم ملح
3 جم محسن خبز
30 جم زبده
250 الى 275 مللى ميه
الطريقه
نعجن كل المقادير معا ونحط الميه شويه شويه حسب تجانش العجينه وتكون عرق وفيها لامعه وملساء مثل الصوره بمعنى لو مسكناه حته عجين ونلفها فى ايدينه ونفردها تتفرد حتى تكون رقيقه وتكون سليمه دون ان تتقطع
وبعدين تريح العجين ونقسم العجين كل جزء 35 جم
ونكور قطعه العجين براحه اليد ونفرد ثم نضغط عليها لطرد الهواء الموجود ونتنى طرف العجين مثل الصوره مره واتنين ونلفه مثل الرول ونجعل الفاتحه تحت ملاصقه للصاج حتى لا تفتح اثناء التخمير
طريقه التخمير يوضع صينيه فيها ميه ساخنه على ارضيه الفرن ويوضع البتى بان على الرف الاوسط ليخمر ويتضاعف
بعد التخمير يسخن الفرن على درجه حراره 200 درجه ويدخل البتى بان وبياخد حوالى 10 :12 دقيقه
----------------
البابا

 
مقادير البابا
ربع كيلو دقيق قوى
3 بيضات كبير ويبقى 4 لو صغير
25 جم سكر
4 جم خميره
5 جم ملح
2 جم محسن خبز
65 جم زبده
الطريقه هنا لها طريقتين
الطريقه الاولى ونتيجتها حلوه
نعجن كل المقادير معا ما عدا الزبدة ونضع الزبده فى الاخر
الطريقه التانيه بنعجن كل المقادير معا
الشيف اختار الطريقه الاولى
وضع كل المقادير معا ماعدا الزبده وعجن لمده 7 الى 8 حتى تكون عرق نتركها ترتاح ربع ساعه وبعدين نحط الزبده الطريه ونعجن حتى تتجانس العجينه هنا يتتميز عن عجينه العيش انها طريه وفيها نسبه السوائل اكتر
وبعدين نبلل ايدينا بالميه ونمسك العجينه فى اليد اليسرى ونضغط فتظهر منها جزء نقطع منها ونضعه فى القالب بحيث ان القالب يكون ثلثه فقط لانه لسه هيخمر
ونتركه يخمر ويدخل فرن ساخن درجه حرارته 150 درجه وبياخد حوالى نص ساعه
وفى اثناء وهو فى الفرن نعمل الشربات
مقادير الشربات
لتر ميه
600 ج سكر وممكن قشر برتقاله او قشر ليمونه لتعطى طعم ولون وعصير نص ليمونه ويكون خفيف ونتركه يبرد
ولما يخرج الباباى من الفرن نتركه يهدأ ونغطسه فى الشربات بحيث انه يتشرب منه وحجمه يزيد ونرفعه من الشربات ويدخل الثلاجه يتماسك وبعدين نفتحه بالورب بالسكين مثل الصوره ونحشيه بكريم شانتيه وقطع الفاكهه والشيف هنا حشاه قطع اناناس وقطع من الخوخ الرقيقه وزينها على شكل ورده ويقدم بألف هنا
--------------- 
الكريمه الزبده (الكريمه اوبير) المطعمه بكريمه البندق هنتز

 
 المقادير
5 ابيض بيض
رشه ملح
2 معلقه سكر خرز
400 جم سكر
400 جم زبده وممكن صل الى 450 جم لو عايزه تكون اقل سكر شويه
الطريقه
1-نضع السكر والميه على النار حتى تصل للكره الطريه وتعرفى ازاى انها وصلت للكره الطريه ؟ تجيبى بوله فيها ميه ساقعه وتحطى نقطه من الشربات وتمسكيه بايديكى لو عملت زى الكره الطريه وتشكليها فى ايديكى يبقى تمام
2- قبل ما يصل السيرب للكره الطريه تشغلى العجان على الابيض البيض ولنجاح الميرنج لازم يكون العجان مش عليه اى اثار دهنيه وناشف وبعدين تشغلى ولما يفك تحى رشه الملح ولما يتماسك تحطى 2 معلقه سكر خرز شويه شويه مع الضرب ليتماسك ومش يهبط ولما يعلى
3- لما يتضاعف الابيض بيض يكون الشربات وصل للكره الطريه تنزلى بيه خيط رفيع مع الضرب حتى ينتهى المقدار وتضربى لغايه ما يبرد تماما تقطعى الزبده مكعبات تحطى مكعب مكعب مع الضرب وخلى بالك متحطيش الزبده الا بعد مايبرد تماما وبعدين تحطى معلقتين كريمه زبده وهتبقىى احلى كريمه زبده وتحشى بيها التورته وتجلسيها مثل الصور وتحطيها فى الفريزر للتتماسك شويه
3- وفى اثناء وهى فى الفريزر تسيحى نص كيلو شيكولاته وتحطى معاهم 75 جم زيت دره وبعدين تخرجى التورته من الفريزر وتحطى الشيكولاته السايحه عليها مثل الصوره والشيف هنا جاب عجينه السكر وعجنها وقطع قطع صغيره وحطها فى قالب سيلكون مكتوب فيه حروف واختار الحروف هنتز ووضع فيها عجينه السكر واخدت نفس الشكل ووضعها على التورته وعمل دائره عليها بعجينه السكر ووضع شيكولاته ترانسفير مكتوب عيها هنتز وحطها على جناب التورته
-----------------------  
الحلقه رقم 25 لمنتجات هنتز الالمانيه
تورته اسمها ساشيه وهى من النمسا
كيكه دسمه ومختلفه فى مقاديريها
المقادير 

200 مللى زبدة
8 ابيض بيض
140 جم سكر بودره
8 أصفر بيض
2 بيضه
200 جم شيكولاته سايحه
60 جم سكر خرز
250 جم دقيق
30 جم كاكاو هنتز
6 جم بيكنج بودر
الطريقه
1- ال 8 ابيض بيض نحطه فى العجان ونضرب لفه نحط رشه ملح ونضرب واول ما يفك الابيض بيض نحط 60 جم سكر خرز ونضرب هتى يصبح ميرنج متماسك بس مش جامد
2- نحط الزبده و140 جم سكر بودره و2 من الاصفر بيض ونضرب ثم نضع ال2 الاصفر التانى ونضرب وهكذا حتى ينتهى المقدار هنا نحط ال 2 بيضه ونضرب
وبعدين نصب ال 200 جم شيكولاته سايحه خيط رفيه مع التقليب بالاسباتيول وبعدين نحط شويه ميرنج ونقلب بالراحه علشان نحافظ على الهواء الموجود ونحط باقى الميرنج على 3 مراحل وفى الاخر
3- نخلط ال 250 جم دقيق مع ال 30 جم كاكاو هنتز وننزل بيه على خليط رقم 2
ونصبها فى صينيه مدهونه بالسمنه ومعفره بالدقيق وتدخل الفرن ساخن على 180 درجه
4- وبعد ما تخرج وتبرد تمام تفتح على 3 رقات وتحشى كل راقه بكريمه الزبده طبقه خفيفه مثل الصوره وتجلس بالكريمه الزبده
وبعدين يصب عليها الشيكولاته السايحه بقليل من الزيت 
---------------------------
مركز القهوة

المقادير
240 جم سكر 60 مللى ميه
200 مللى ميه 100 جم قهوة سريعه الذوبان من هنتز
الطريقه
نضع ال 240 جم سكر وال 60 مللى ميه على النار لغايه ما يبقى كراميل غامق يعنى يصل درجه حرارته الى 180 درجه
وبعدين ننزل عليه ب 200 مللى ميه بس لازم تكون ساخنه علشان لم تنزل متكلكعش ونسيحها تانى وتتحرق مننا
وبعدين نقلب حتى تتجانس ونرفعها من على النار
نحطى على طول ال 100 جم قهوة ويستحسن قهوة هنتز الالمانيه ذات الطعم القوى
ونقلب لغايه ما يدتدوب القهوة وتصبح متجانسه ونحطها فى برطمان لتكون جاهزه للاستخدام 
-------------
طريقه حقن الدونتس مثل الصوره 

 
 نضع الكريم باتسيريه فى كيس حلوانى ونحقن الدونتس ناحيه الشمال من الدنتس حتى نحس بامتلائها ونغير الاتجاة فى نفس الفاتحه ناحيه اليمين ونحشى حتى تمتلا
ونزينها من الخارج بكريمه باستيريه مخلوطه مع مركز القهوة 
--------------------------
الصوره توضح مدى تماسك الفندان وكريمه الفراوله هنتز

لازم يكون متماسك بعض الشىء بحيث لما نحطه على الدونتس ينزل ويغطى بشكل جميل مش خفيف والصوره هنا توضح 
----------------
الصوره هنا توضح
طريقه حقن الدونتس بكريمه الحشو

 
 كريمه حشو الدونتس
المقادير
طريقه عمل الباتسيريه
المقادير
نص كيلو لبن
2 بيضه
50 حم دقيق
كريمه الفراوله لهتنز - او مركز قهوة هنتز
الطريقه
1- نحط اللبن على النار يغلى
2- نضرب البيض مع السكر والدقيق
وطالما حطيت بيض على سكر لازم نضربه بسرعه ومش يستنى ليه ؟ علشان السكر هيمتص كل الرطوبه اللى فى البيض ويخرز وهيكلكع ومش هيدوب
3-واول ما اللبن يغلى نرفعه من على النار وننزل بي خيط رفيع على خليط البيض والسكرونقلب بسرعه علشان البيض مش يستوى ويبقى زى الاموليت
وترجعه تانى على النار ونقلب وهنلاقيه عمل فقاقيع ونقلب لغايه ما الخليط يكون اصيح له قوام ومتماسك وشبه المهلبيه ويقى زى الصوره ونضع عليه قطعه زبده او كريمه لبانى ونغطيه وتنركه يبرد 
-----------------------
 الصوره هنا توضح الشكل النهائى للدونتس بعد الحشو والتزيين وتخمير الدونتس ودرجه نجاح الدونتس وهشاشته مثل الصور المرفقه 

 ------------------------
الصوره هنا توضح 

1- قوام العجينه متجانسه وفيها لامعه ولونها ابيض عن قبل العجن
2- الفرق بين قبل وبعد تخمير الدونتس
3- طريقه تخمير الدونتس فى الفرن
اننا نضع طاسه فيها ميه مغليه على ارضيه الفرن ونضع الدونتس على الرف الوسطانى بالفرن ونتركه حتى يتضاعف حجمه
4-شكل القطاعه وطريقه فرده وتقطيعه 
--------------
الحلقه 24 من منتجات هنتز
طريقه الدونتس بكاكاو هنتز الالمانى 

نص كيلو دقيق
10 جم خميره
30 جم سكر
10 جم ملح
3جم محسن
10 جم كاكاو هنتز
بيضه واحده
50 جم لبن بودره حسب الرغبه
50 جم زبده حسب الرغبه
225 : 260 ملل ميه للعجن حسب قوام العجينه واذا استعملتى زبده بتقلل كميه الميه
الطريقه
1- نضع كل المقادير معا ماعدا الميه نضع نصفها فقط ونعجن كل المقادير واذا العجينه محتاجه ميه نضع شويه بشويه حتى تتجانس وتصبح لها مطاطيه ولونها يصبح فاتح اللون وبه لامعه
2- نتركها ترتاح ربع : نص ساعه
3- نرش رشه دقيق ونفرد العجينه حوالى 1 سم وشيه مثل الصوره
5- نضع القطاعه فى الدقيق علشان مش تلزق وننضغط على العجينه حتى تتشكل مثل الصوره او بحافه كوب ونعمل فيه دائره صغيره حتى تكون مثل الصوره ونسيب القع الصغير اللى طلعت من النص تتقلى ويكون وحدات دونتس صغيره وممكن نلمها معا ونعجنها تانى حتى تتجانس معا ونشكلها مره تانيه
ونتركها تخمر( وعمليه الخمير هنا وضع اى اناء به ميه ساخنه على ارضيه فرن البوتاجاز وضع صاج الدونتس على الرف الوسطانى ونتركه حتى يتضتعف الحجم )
6-وبعد عمليه التخمير نسخن زيت على النار غزير ونضع الدونتس فيه ويتقلى وهنلاقى ظهر خط فى الوسط لونه ابيض وده دليل على نجاح الدونت وكل ناحيه بتاخد حوالى دقيقتين مش اكتر
تركه الشيف احمد جزاة الله خيرا
1- الزيت يكون ساخن اوى يقلى الدونتس ويرتفع لان الخميره بترفعه ولما اقلبه الناحيه التانيه يتقلى ويرتفع ويلون ويكون نى من الداخل 
----------------------------
البغاشه بحشوة كريمه البندق وقطع الموز

مقادير البغاشه
هى نفس مقادير الفطير المشلتت
نص كيلو دقيق ويكون دقيق لكل الاغراض
125 جم زبده مارجرين
275 مللى ميه
30 مللى زيت
30 جم سكر
1 جم ملح
الطريقه
عجن مباشر يعنى نضع كل المقادير معا مع نص مقدار الميه ونعجن ونضع باقى الميه حسب تجانس العجينه وتغطى وتترك لترتاح
وهنا طريقتين نجعلها عجينه صايمه لو مش هشتغل بيها على طول
ولو كنا هنشغل بيها على طول نزود شويه ميه حتى تكون عجينه لينه

1- نكون ضربين الزبده جيدا حتى تكون مثل الكريمه وسهله الفرد
2- رشه دقيق على الرخامه ونفرد العجينه
3- ندهن العجينه بالزبده الكريمى ونلف من الطرف العجينه حتى تكون مثل الرول
4-نقطع الرول الى 7 اجزاء ونحضر بوله فيها زيت وندهن الصاج وكل جزء بالزيت ونترك العجين يرتاح
ربع ساعه ويغطى ببلاستك فيلم وعلشان تختبر العجينه انها ارتاحت كويس ام لا اننا نضغط بصابعنا على القطعه لو ردت تانى يبقى لسه عايزه ترتاح ودى تركه للشيف احمد جزاه الله كل الخير
5- ندهن العجينه بالزيت وكل قطعه ندهنها بزيت ونفرد كل جزء بالنشابه او بايدينا هنلاقيها سهله الفرد
ونخلى الاطراف اقل ارتفاع من الوسط لانها لسه هتطبق مثل الظرف فيكون كلها فى ارتفاع واحد ونضع كريمه البندق هنتز وقطع الموز
6-ونطبق البغاشه مثل الصوره ونحطها فى الصاج مدهون زيت وتدخل فرن ساخن على درجه
ولما تخرج تسقى بالشربات البارد وبألف هنا
تركه الشيف
استعمال دقيق لجميع الاغراض
لازم العجين يرتاح
استعمال كريمه البندق هنتز لسهوله فردها واعطاء طعم الشيكولاته القوى

 ------------------------------
الحلقه رقم 23 لمنتجان هنتز الالمانيه
البوشيه

المقادير
عجينه ملفى
ونفردها ونقطعها بقطاعه على شكل مدور ونقطع واحده تانيه على شكل مدور نقطعها من النص بدائره اصغر مثل الصوره ونضعها على بعض وترتاح ساعه وبعدين تدخل الفرن وبالطريقه دى نضمن البوشيه يكون كله فى ارتفاع واحد باننا نحط شبكه لها ارجل بارتفاع 2سم وتدخل الفرن بالطريقه دى يكون البوشيه كله بارتفاع واحد وبعد السوى نحشيه بالكريمه الباتسيريه وكريمه الفراوله هنتز الالمانيه ونجملها بالفراوله المغطسه بالشيكولاه

طريقه عمل الباتسيريه
المقادير
نص كيلو لبن
2 بيضه
50 حم دقيق
كريمه الفرواله لهتنز
الطريقه
1- نحط اللبن على النار يغلى
2- نضرب البيض مع السكر والدقيق
وطالما حطيت بيض على سكر لازم نضربه بسرعه ومش يستنى ليه ؟ علشان السكر هيمتص كل الرطوبه اللى فى البيض ويخرز وهيكلكع ومشهيدوب
3-واول ما اللبن يغلى نرفعه من على النار وننزل بي خيط رفيع على خليط البيض والسكرونقلب بسرعه علشان البيض مش يستوى ويبقى زى الاموليت
وترجعه تانى على النار ونقلب وهنلاقيه عمل فقاقيع ونقلب لغايه ما الخليط يكون اصيح له قوام ومتماسك وشبه المهلبيه ويقى زى الصوره ونضع عليه قطعه زبده او كريمه لبانى ونغطيه وتنركه يبرد
وبعدي مايبرد نقسم نصفين نصف نخلط معاه كريمه الفراوله هنتز حتى تتجنس وتكون سهله اننا نضعها فى كيس الحلوانى
ونملآ البوسيه بالكريمه اللى بالفراوله ونضع فيها كريمه باتسيريه تانى
ونجملها بوحادت الفراوله المغطسه فى الشيكولاته الغامقه والبيضاء مثل الصور وفيه منها تشكبله كبيره فى الصور المرفقه

 ---------------------------------
مشروب هنتز 

3\4 لتر لبن
10 جم كاكاو هنتز الالمانى
75 جم كريمه البندق هنز الالمانى
40 جم سكر او حسب الرغبه
نضع كل المقادير معا فى بوله على النار وتقلب حتى تتجانس كل المقادير ونصبها فى كاسات ونحط فوق الوض كريمه مخفوقه وعليها رشه فستق وده اختيارى
تركه الشيف استعمل كاكاو هنتز لانه جيد الذوبان وليس له اى شوائب ويمتاز بالطعم واللون القوى
وله فوائد تانيه كتير 
-------------------
البقسماط بكاكاو هنتز

350 جم دقيق 100 جم زيت
10 جم كاكاو هنتز 5 جم خميره
20 جم سكر 3 جم ملح
الميه ممكن تكون 175 ملل او على حسب العجينه
تخلط حميع المقادير ما عدا الميه ننزل بيها شويه شويه حسب حاجة العجينه
وبعدين تريح شويه ونفردها وتقطعها شرائط طويله وناخد كل شريط ونضغط عليه بايدينا علشان نخرج الهواء الموجود ثم نلفه اسطوانه مثل الصوره ونتركه يرتاح شويه وبعدين ندهنه بالبيض ونرش رشه سمسم او حبه البركه او ملح حسب الرغبه
ويدخل الفرن على 150 درجه لمده 30 الى 35 دقيقه
التركه الخاصه بالشيف احمد ربنا يبارك له
الزيت ينشف العجينه والزبده تخلى العجينه طريه
وحراره الفرن الهاديه تجلس المنتج كرسبى والعالى تخليه طرى
والعجينه المفتوحه اللى فيها الميه اكتر وتكون طريه ولينه ونشتغل بيها على طول من غير ما ترتاح
والعجينه الصايمه هى اللى فيها الميه قليله ولازم ترتاح الاول وبعدين نشتغل بيها 
----------------
مقادير الترسه 

300 جم دقيق 3 جم ملح
5 جم خميره 75 جم زبده
150 مللى ميه حسب الدقيق
عجوه مع قطعه زبده علشان تكون لينه
الطريقه نضع كل المقادير معا ما عدا الميه تحطها شويه شويه حتى تلم العجينه
يعنى الاول نضرب على السرعه الهاديه حتى تتجانس نعلى السرعه ونخلط وننزل بالميه شويه شويه
وبعدين نريح العجينه ربع ساعه ثم نشكلها ونعمل منها شرائط طويله ونحشيها بالعجوه ونكون عاملينها زى الرول ونحطه فى وسط العجينه ونطبق عليها ونيجى من الطرف ونبططها وبعدين نجيب سكينه ونعمل فيها فتحات تبقى شبه الترس ونقفلها ونلزق الاطراف وندهنها بالبيض ونرش عليها رشه سمسم ونتركها تخمر وتدخل الفرن 180 درجه 
---------------------
تورته التراميسو وهى تورته ايطالي
نستخدم فيها كاكاو هنتز وقهوة هنتز

 
 بسكويت السافويار
مقادير الكريمه
1 - البتابوم يتكون من
3 بيض مفصول الابيض لوحده والاصفر لوحده -250 جم جبنه كريمى وغير مملحه
75 جم سكر -225 جم كريمه لبانى
6 جم جيلاتين مذابه فى 35 مللى ميه
25 جم سكر فانيليا
الطريقه
1 - نحط ال 57 جم سكر مع معلقتين ميه فى طاسه على النار حتى يتماسك ويعمل عود
2 - نضرب البيض فى العجان لفتين نحط رشه الملح ونضرب وبعدين نحط 25 جم سكر ونضرب لغايه ماعمل فوليوم يكون الشربات جاهز وعمل عود نحط الشربات خيط رفيع على خليط البيض والسكر علشان يستوى البيض ونضرب لغايه ما يبرد
3- نحط ال 6 جم جيلاتين فى ميه من الحنفيه ونسيبها لغايه ما تنفش وتبقى زى الاسفنج ونسيحه فى الميكرويف 4- نضرب الكريمه اللبانى يدوب ضربتين ومش كتير علشان ميقلبش زبده وكمان لسه هنخلطه مع الخليط
5- نجيب الجبنه ونحطها فى البوله الاول لانها كثافتها تقيله ونحط عليها البتابوم (البيض والسكر والشربات )
ونقلب تقلبتين وبعجين تحطى الكريمه اللبانى ونقلب ونحط بعد كده الجيلاتين السايحه وكده الكريمه اصبحت جاهزة وننزل بنص الكميه على الاسبونج اللى وضعناه فى قاع الصينيه ونحط وحدات من اصابع السافويار بعد ما نزلناها فى مشروب قهوة هنتز ذات الطعم المميزونصب فوقها باقى الكريمه وبعدين نرش رشه كاكاو هنتز وبألف هنا 
--------------------------

الروانى 

 4 بيض -125 جم سكر
125 جم دقيق -نص معلقه صغيره بيكنج بودر
35 جم سميد
الطريقه
1- نضرب السكر مع البيض معا حوالى 8 دقائق حتى تتضاعف الحجم وتهيش ولما نرفع المضرب الخليط يقف على الوش
2- نخلط الدقيق والسميد مع البيكنج بودر والفانيليا
3- نضع خليط رقم 2 على البيض و السكر شويه شويه وونقلب و نحافظ على الهواء الموجود
ونصب الخليط فى صينيه مدهونه بسمنه ومعفره بالدقيق
ونملآ الصينيه ثلثين الصينيه مقاس اصينيه 24 سم
وتدخل فرن درجه حرارته 180 درجه لمده 25 دقيقه
ولما تخرج نسبها تبرد ونسقيها بالشربات البارد
كوب ميه وكوب سكر ونص ليمونه
-----------------------
 طريقه عمل الرموش

ربع كيلو دقيق 1 أبيض بيض
150 جم زبده بدرجه حراره الغرفه
35 جم جوز هند
40 جم سميد بسبوسه
5 جم بيكنج بودر
فانيليا
25 جم سكر بودره
شربات خفيف
كوب وربع سكر وكوب ميه وعصير ليمونه
الطريقه نخلط الزبده والسكر حتى يهيش ولولنه يميل للون الابيض ويهيش نحط الابيض بيض ونضرب
نخلط الدقيق مع السميد مع البيكنج بودر
ننزل بالدقيق على خليط الزبده والسكر والابيض بيضه حتى تتماسك وتدخل والثلاجه ترتاح ربع ساعه ثم تخرج ونشكلها مثل الصورة وندهن وشها بالاصفر بيضه ونجملها بربع كريز و احده وتدخل الفرن على حراره 180 درجه لمده نص ساعه وتخرج تنزل فى شربات خفيف
----------------------

مقادير البسبوسه بالكريمه زى تورت الموس

ربع كيلو سميد - نص معلقه صغيره بيكنج بودر
55 جن سمنه سايحه - فانيليا
115 مللى لبن دافى - 25 جم جوز هند
35 جم زبادى - 150 جم سكر
الطريقه
1- نحط اللبن والسكر والزبادى ونقلب حتى يدوب السكر شويه ونحط السمنه
2- ونخلط السميد مع البيكنج بودر وجوز الهند
3- نحلط الخليط رقم 1 على الخليط رقم 2 ويدوب تقلبتين ونحطها فى صينيه مدهونه بالسمن او مفروشه بورقه زبده ومدهونه وننوزعها فى الصينيه مقاسها 22 سم وتدخل الفرن على 190 درجه وبتاخد حوالى 25 دقيقه
ولما تخرج من الفرننكون مجهزين شربات كوب وربع سكر و كوب ميه ومعلقه عسل جلوكوز وعصير ليمونه واول ما تخرج الصينه من الفرن نسقيها بالشربات وبتاخد حوالى 200 الى 250 جم شربات
نكون جهزنا الكريمه
مقادير الكريمه
200 مللى لبن رايب - 200 جم كريمه لبانى
7 جم جيلاتين - عصير ليمونه
1 -نحط للجيلاتين ضعفها ميه ونقلب وندخلها الميكرويف لمده دقيقه
2- نضع اللبن الرايب وعصير الليمونه علشان نزود طعم المزازه شويه وممكن بدل منه نجيب السور كريم جاهز من السوبر ماركت ونضربها ضرب خفيف ونحط عليها اللبن الرايب ونقلب وبعدين نحط الجيلاتين السايحه وكده الكريمه جاهزه للاستعمال
2- نغلف البسبوسه بورق بوربولين حواليها ونصب عليها الكريمه وتدخل الثلاجه لتتماسك
3- نخرجها من الثلاجه وتقطع الخوخ بسكين حاميه ونرص كل وحده خوخ بحيث ان كل واحده تكون فى اتجته السنتر فى الوسط حتى تكون الرصه مظبوطه ونرص كله معا وفى
الاخرنجملهابوحده كريز ص
------------------------------- 
طريقه عمل الزلابيه 

ربع كيلو دقيق قوى علشان يكون فيه عرق
ربع لتر ميه رشه ملح صغيره
معلقه سكر 5جم خميره فوريه
معلقه كبيره زيت لو استعملنا خميره بيره تبقى
3 اضعاف يعنى 15 جم
الطريقه نحلط كل المقادير معا ونربها علشان يصبح بيها عرق قوى زى الصوره
ونغطيها ترتاح نص الى ثلاث اربع ساعه وبعدين نهبطها تانى
وناخد معلقه مبلله بالميه ونمسك العجينه بايد والتانيه فيها المعلقه زى الصوره الموضحه وناخد ونضعها فى الزيت الساخن
ونقلب حتى تاخد اللون الذهبى الجميل وأول ما تطلع من الزيت نضعها فى سيرب تقيل
ملحوظه للشيف احمد
لو فرشت منك فى الزيت يبقى تزودى شويه دقيق وتربيها كويس 
---------------------
مقادير اسبونش اومليت 

5 أصفر بيض
18 جم سكر
رشه ملح
4 أبيض بيض
57 جم سكر رشه
40 جم نشا
80 جم دقيق
10 جم كاكاو هنتز
الطريقه
1- نضرب الاصفر بيض مع 18 جم سكر و رشه ملح حتى يتجانس ولونه يميل للبياض
2- نضرب الابيض بيض مع 57 جم سكر حتى يهيش ويبقى كريمى زى الصورة
3- نخلط الدقيق مع النشا مع الكاكاو
5 - نضع االابيض خليط الابيض فوق الاصفر بيض دائما نحط الاخف كثافه على الاتقل
وبعدين نحط الدقيق بحرص ونقلب من غير ما نخرج المعلقه بره الخليط ونقلب حتى يتجانس ونضع السيلكون فى الصاج او ورق زبدة مدهونه بالسمنه ومعفره بالدقيق ونملآ كيس حلوانى بالخليط ونعمل ديسكات مثل الصوره ويدخل الفرن على حراره 200 درجه ولمده 8 : 10 دقائق ومتزودش علشان مينشفش
واول ما يخرج من الفرن نتركه يهدأ شويه ثم نغطيه بفوطه نضيفه ونحضر الحشوه
عباره عن كريم شانتيه ووحدات من الفراوله
ونقطع الفراوله نختار الفراوله الصحيحه ونقطعها شرائح مع مراعاه عدم فصلها نهائيا ونفتحها من الجهه المفصوله حتى تكون شكل المروحه
نحضر الاسبونش الاومليت ونتنيه مثل الساندوتش ونحشيه بالكريمه ونضع فيه وحدات الفراوله اللى على شكل مروحه ومن فوق خطوط من الشيكولاته السايحه ورشه فستق
تركه الشيف
دائما نحط الخفيف على التقيل بمعنى نضع الابيض بيض على الاصفر بيض
نخلط الابيض بيض حتى يصبح مثل الكريم شانتيه
خلط الدقيق والنشا والكاكاو بالراحه والمحافظه على الهواء المتكون
استعمال كاكاو هنتز الالمانيه لطعمه القوى ورائحته الزكيه ولونه الغامق 
------------------------
مقادير الشيكوليت شيبس 

170 جم سكر بودره
125 جم زبدة
بيضه تكون دافيه
170 جم شيكولاته دروبس
190 دقيق
4 جم بيكنج بودر
رشه ملح
20 جم كاكاو هنتز
الطريقه
#-نضرب الزبده مع السكر البودره لغايه ماتهيش وتبقى كريمى نحط البيض ونضرب لغايه ما تختفى
#- نخلط الدقيق مع رشه الملح والكاكاو والشيكوليت
#- نضع خليط الدقيق على خليط الزبدة ونقلب والعجينه تكون بتلزق خفيف وترتاح شويه ثم نشكلها ونعملها كور ونضع عليها بعض حبات الشيكوليت دوبس ونحطها فى الصاج على ابعاد متباعده علشان هتفرش لما تتخبز
#- وتدخل الفرن ساخن على حراره 180 : 190 درجه
وبتاخد حوالى 10 دقائق
وبعد ما تطلع من الفرن وتبرد نعمل ميروار ونضعها عليها مثل الصوره
تركات الشيف احمد جزاة الله خيرا
1- البيض تكون دافيه مش ساقعه علشان الزبده متفصلش
2- العجينه تكون بتلزق خفيف علشان نسبه السكر عاليه
3- بعد العجن نريح العجينه ربع ساعه